Harpa Árnadóttir er kunn fyrir málverk sín, bæði verk sem hún kallar ,,sprunguverk” og önnur sem unnin eru með vatnslit á pappír og striga. Hvort tveggja felur í sér tilraunakennda rannsókn á yfirborði og gegnsæi. Málverk Hörpu eru gjarnan samsett úr lögum af vatnsleysanlegum lit og lími sem um síðir koma sprungur í og þannig myndast landslagskenndar formgerðir á striga. Þessar formgerðir minna á landslag, aragrúa litbrigða og samspils forma og skugga. Í vatnslitaverkum hennar mótar pappírinn sjálfur formgerðina ásamt lögum lita sem mynda þokukennda hulu yfir myndina. Grunnur margra verka hennar er sambandið milli málverks og bókmennta, eða nánar tiltekið sú hugmynd að líta megi á málverk sem sjónræna ljóðlist. Harpa er fædd 1965 á Bíldudal en ólst upp í Ólafsvík á Snæfellsnesi. Harpa sneri sér að myndlist eftir að hafa lokið BA gráðu í sögu og bókmenntum við Háskóla Íslands. Hún nam við Myndlista- og Handíðaskólann og lagði síðan stund á framhaldsnám við Konsthogskolan Valand í Gautaborg. Verk Hörpu hafa verið keypt og sýnd af söfnum víða í Evrópu og þau birtust á fyrsta tvíæringnum í Gautaborg, á Momentum, sjötta norræna tvíæringnum í samtímalist í Moss í Noregi. Sumarið 2011 gaf bókaútgáfan Crymogea út safn texta og vatnslitaverka eftir Hörpu undir heitinu Júní / June.