Jóna Hlíf (f.1978) útskrifaðist frá fagurlistadeild Myndlistaskólans á Akureyri 2005, lauk MFA-gráðu frá Glasgow School of Art í Skotlandi 2007 og MA-gráðu í listkennslu frá Listaháskóla Íslands 2012. Jóna Hlíf hefur haldið einkasýningar á viðurkenndum sýningarstöðum, m.a. í Listasafni Reykjavíkur og í Listasafninu á Akureyri. Hún hefur tekið þátt í fjölmörgum samsýningum og eru verk hennar í eigu opinberra safna. Textaverk, tilraunir með efni og innsetningar eru kjarninn í myndrænni tjáningu verka Jónu Hlífar. Texti sem áferð: sem leið til að birta hugsanir, við að setja fram og skapa samfélag, eða sem grundvöllur hugmynda. Í verkunum hefur Jóna Hlíf m.a. fengist við fyrirbærin kjarna, tíma og ímynd sögunnar.

Verkin Inn undir líf og Í mynd er dýptin einföld eru frá sýningunni INNRA / YTRA.

Jóna hefur alltaf heillast af hugmyndum um línur sem skil eða mörk, ekki hvað síst vegna þess að þær skapa veggi milli einhvers sem er og einhvers sem er ekki. Við drögum línur í sandinn, setjum upp reglur og kerfi út frá hugmyndum um línur sem mörk. Út frá þeim búum við svo okkur til hugmyndir um mótsagnir og andstæður, hvort tveggja sterk fyrirbæri sem hafa áhrif bæði á skynjun og hugsun. 

Hugmyndin á bak við textaverkin byggir á innblæstri úr þremur bókum: Myndasögu eða barnabók um andstæður, sem ég las þegar ég var barn, hugmynd úr Handan góðs og ills eftir Nietzsche um að andstæður séu ekki til, og japanskri bók um samvirkni ólíkra lita. Það er eitthvað við það hvaða litir passa saman og hvaða litir ekki, sem mér finnst styðja við hugmyndir um að hrein tvíhyggja eigi ekki alltaf við. Að lífinu eigi frekar að lifa út frá jafnvægi og samvirkni, frekar en að einblína á línuna sem sker úr um hvað er og hvað ekki.