Jóna Hlíf (f. 1978) útskrifaðist með MA í listkennslu frá Listaháskóla Íslands árið 2013 og með MA gráðu frá Glasgow School of Art í Skotlandi árið 2007.

Árið 2022 kom út bókin Brim Hvít Sýn sem fjallar um myndlist Jónu Hlífar, innsetningar og textaverk sem hún hefur skapað undanfarna tvo áratugi. Ritstjóri bókarinnar er Auður Aðalsteinsdóttir, doktor í bókmenntafræði, og hönnun og útlit voru í höndum Júlíu Runólfsdóttur. Bókin hlaut silfurverðlaun FÍT fyrir bókakápu og bókahönnun.

Textaverk, tilraunir með efni og innsetningar eru kjarninn í myndrænni tjáningu verka Jónu Hlífar. Texti sem áferð: sem leið til að birta hugsanir, til að setja fram og skapa samfélag eða sem grundvöll hugmynda. Í verkunum hefur Jóna Hlíf m.a. fengist við fyrirbærin kjarna, tíma og ímynd sögunnar.

Verk Jónu Hlífar hafa verið sýnd víða í söfnum og galleríum bæði innanlands og erlendis. Þar ber helst að nefna einkasýningar í Listasafni Reykjavíkur, Listasafninu á Akureyri og Berg Contemporary. Hún hefur einnig tekið þátt í fjölda samsýninga, meðal annars í Listasafni Íslands, Listasafni Árnesinga, Kuckei+Kuckei og Nýlistasafninu.

Á ferli sínum hefur Jóna Hlíf hlotið fjölda styrkja og eru verk hennar í eigu opinberra listasafna.