Á sýningunni „Náttúran teiknar sig“ er að finna olíumálverk og vatnslitamyndir. Eins og í fyrri verkum sínum leitar Aðalheiður Valgeirsdóttir innblásturs í náttúruna og úrvinnslan rambar á mörkum hins raunverulega og hins huglæga með áherslu á yfirborð, undirlög, form, áferð, línu, lit og birtu. Verkin eru unnin á vinnustofu Aðalheiðar á Suðurlandi þar sem síbreytileg náttúran veitir stöðugt nýja sýn.
Við okkur blasir viss óreiða í gróðurþekjunni sem tekur á sig mynd. Við nánari skoðun tökum við eftir kerfi uppbyggingar sem náttúran teiknar í plöntum, greinum, stilkum og grösum. Náttúran kallar á abstrakt útfærslu þar sem greinar kvíslast, vefjast saman og teygja úr sér í líflegu línuspili. Forgrunnur og bakgrunnur spila saman og mynda náttúrulegt rými dýptar og forgengileika, eins konar eilífðarmynstur eða rótarkerfi þar sem gróður, vatn og himinn koma saman. Spurning vaknar um hvað er upphaf og hvað er endir.
