Nýjasta mónóprentsería Gjörningaklúbbsins kemur úr sjónrænum undirdjúpum myndlistarkvennanna Eirúnar Sigurðardóttur og Jóníar Jónsdóttur sem hafa unnið saman undir merkjum Gjörningaklúbbsins frá 1996. Hvert og eitt prent er einstakt og hafa listkonurnar valið sex stór og sex minni verk úr prentferlinu sem helgast af miklu flæði og færni. Þær vinna með hversdagslegan efnivið, veiðarfæranet og misgrófofna textílbúta, sem í abstrakt faðmlögum, kalla fram orð hjá listakonunum. Verkin óska bókstaflega eftir því að vera leyst úr viðjum nafnleysisins, eftir að hafa þrykkst á þykkan grafíkpappírinn, orðið til, fyrir tilstilli alkemíu listarinnar.