Verkið er af sýningunni Skilaboð að handan, einkasýningu Gjörningaklúbbsins: Eirúnar Sigurðardóttur og Jóníar Jónsdóttur, í Gallery Port, Reykjavík.

Sýningin hverfðist um upptöku á miðilsfundi sem Gjörningaklúbburinn átti við Ásgrím Jónsson (1876–1958) listmálara árið 2019. Gjörningaklúbburinn hefur allar götur síðan fundið sig knúinn til að koma skilaboðum hins framliðna frumkvöðuls íslenskrar myndlistar á framfæri, enda eiga þau fullt erindi við samtímann. Miðilsfundurinn fór fram á fyrrum heimili Ásgríms að Bergstaðastræti 74, sem hluti af undirbúningi fyrir einkasýningu Gjörningaklúbbsins Vatn og blóð, sem fram fór á Listasafni Íslands árið 2019 og var unnin út frá Ásgrími og list hans. Við undirbúning sýningarinnar vildi Gjörningaklúbburinn forvitnast um hvort miðillinn myndi skynja eitthvað nýtt í tengslum við Ásgrím – eitthvað sem ekki stendur í listasögubókum – en bjuggust ekki við að andi Ásgríms sjálfs, skoðanir hans og viðhorf, myndu koma svona sterkt fram. Á sýningunni hljómaði miðilsfundurinn af vínylplötu sem gefin var út í 30 platna upplagi ásamt nýjum vatnslitaverkum sem Gjörningaklúbburinn vann fyrir hvert eintak af plötunni. Hverri plötu fylgdi textabók með skrásetningu fundarins á íslensku og ensku.