Sara Björk Hauksdóttir vinnur gjarna með hinn ósýnilega heim. Þannig hefur hún bæði fjallað um þann heim sem við sannarlega getum séð en tökum ekki eftir og þann sem er okkur alls hulinn; heim hins órökrétta, töfrum lukta og ljóðræna. Hún nýtir sér aðferðir absúrdisma og lætur gjarna viljandi af stjórn í vinnuferlinu. Það gerir hún til að mynda með því að hleypa öðrum einstaklingum, náttúrunni og/eða tilviljuninni til samstarfs í ákvarðanatöku. Náttúrunnar heimur er henni hugleikinn og snúast verk hennar iðulega um tengsl manna við náttúruna, þar sem áhersla er lögð á líkindi manns og náttúru frekar en að þeim sé teflt upp sem andstæðum.