Arngunnur Ýr er með BA-gráðu í málaralist frá San Francisco Art Institute 1986. Hún var gestanemi við Gerrit Rietveld-akademíuna í Amsterdam, Hollandi 1989–90 en sneri síðan aftur til Kaliforníu og lauk meistaragráðu í málaralist frá Mills-háskólanum í Oakland 1992. Arngunnur býr í Kaliforníu og á Íslandi. Arngunnur hóf feril sinn í nýja málverkinu en hefur þróað sig áfram í landslagsverkum síðustu tuttugu ár. Hún hefur fengið ýmis verðlaun og viðurkenningar fyrir verk sín svo sem úr sjóði Svavars Guðnasonar og Ástu Eiríksdóttur og 2005 hlaut hún Pollock-Krasner styrk. Þá hefur hún einnig notið listamannalauna frá íslenska ríkinu. Verk hennar hafa verið sýnd hér á landi, í Evrópu og Bandaríkjunum og verk eftir hana eru í eigu opinberra safna en einnig ýmissa stofnana og hjá einkasöfnurum bæði hér á landi sem erlendis.