Á sýningunni Birting leiðir Listval saman Erlu Þórarinsdóttur og Kristínu Gunnlaugsdóttur, listakonur sem vinna báðar með sterk form, dýpt og nákvæmni. Verkin eru markviss í framsetningu, með öguðu handverki og næmu auga fyrir efni, litum og aðferðum. Báðar leita þær að frummynd og formi í gegnum líkama og tilfinningu, en í verkum þeirra beggja opnast sú sama spurning: hvernig verður eitthvað sýnilegt? Þannig myndast milli þeirra samtal um ljós, línu, líkama og merkingu.
Birting vísar hér til þess augnabliks þegar eitthvað verður sýnilegt: þegar litur skiptir um tóna, þegar saumur teiknar nýja línu, þegar silfur tekur við ljósi, endurkastast eða þegar áhorfandinn skynjar verkið á nýjan hátt eftir því hvernig og hvar er horft.
Í verkum Erlu Þórarinsdóttur birtist hið sammennska; hún leitar að frummyndum og samhengi mannsins í heiminum. List hennar er öguð og frjáls í senn, í stöðugu jafnvægi en þrungin orku. Erla útskrifaðist frá Konstfack í Stokkhólmi árið 1981 og hefur starfað að myndlist síðan. Hún hefur sýnt víða á Norðurlöndunum, í Vestur-Evrópu, New York, Indlandi og Kína og tekið þátt í fjölda sýninga hér heima og erlendis. Erla býr og starfar í Reykjavík.
Kristín Gunnlaugsdóttir er þekkt fyrir fjölbreytt handbragð og myndmál sem spannar allt frá íkonamálun og fígúratífri hefð yfir í abstrakt og útsaumsverk. Í verkum hennar er líkaminn miðpunktur; ekki sem hlutlaust form heldur lifandi farvegur tilfinninga, minninga og sjálfsmyndar. Hún lærði myndlist við MHÍ og síðar í Róm og Flórens og hefur haldið fjölda einkasýninga ásamt því að taka þátt í sýningum hér heima og erlendis. Nýlega opnaði einkasýning hennar Ósagt í Listasafni Reykjavíkur. Kristín býr og starfar á Seltjarnarnesi.
